Deu 22 | NdeIBE | STEP | Ungabona inkabi loba imvu yomfowenu iduha, ungayiyekeli kodwa ibuyisele kuye.

Deuteronomy 22

1 Ungabona inkabi loba imvu yomfowenu iduha, ungayiyekeli kodwa ibuyisele kuye. 2 Uba umzalwane wakho engahlali eduze lawe loba ungakwazi ukuthi isifuyo lesi ngesikabani, sithathe uhambe laso emzini wakho usigcine aze afike esidinga. Usungasibuyisela kuye. 3 Wenze njalo ungafumana ubabhemi loba ibhatshi lomzalwane wakho loba kuyini okumlahlekeleyo. Ungakuyekeli.

4 Ungabona ubabhemi loba inkabi yomfowenu iwele endleleni, ungayiyekeli. Umsize umfowenu ngokuyivusa.

5 Owesifazana angagqoki izigqoko zesilisa, lowesilisa angagqoki izigqoko zowesifazana, ngoba uJehova uNkulunkulu wenu uyanengeka ngalowo owenza lokho.

6 Nxa ungafumana isidleke senyoni eceleni kwendlela, sisesihlahleni loba phansi, unina efukamele amachwane kumbe amaqanda ayo, ungathathi unina labantwabakhe.

7 Ungathatha abantwana, uyekele unina ahambe ukuze kube kuhle kuwe njalo ube lempilo ende.

8 Nxa usakha indlu entsha, uzakwakha umduli oluthango ephahleni lwayo ukuze kungabi lomuntu owayo ephahleni lwendlu yakho ube lecala lokuchitha igazi.

9 Ungahlanyeli inhlanyelo eziyimihlobo emibili esivinini sakho; ungakwenza, akuyikuba yizilimo ozihlanyelayo kuphela ezithukiweyo, kodwa lezithelo zevini.

10 Ungabophi ndawonye ejogweni inkabi lobabhemi nxa ulima.

11 Ungagqoki isigqoko eselukwe ngewulu lelineni ndawonye.

12 Yenza intshaka uzithungele emiphethweni yomine yebhatshi lakho oligqokileyo.

Ukwephulwa kwemithetho yokuthathana

13 Nxa indoda ithatha umfazi, kuthi ngemva isike yalala laye, ingamthakazeleli 14 imgcone imbize ngamagama amabi, isithi, “Ngathatha umfazi lo, kodwa ngathi ngilala laye ngafumana ukuthi kaseyiyontombi egcweleyo,” 15 ngakho uyise lonina wentombi bazaletha ubufakazi ebadaleni bakulelodolobho esangweni bokutshengisa ukuthi ibikade iyintombi.

16 Uyise wentombi uzakuthi ebadaleni, “Ngendisela indodakazi yami endodeni le, kodwa ayisamfuni. 17 Khathesi isiyigcona isithi, ‘Indodakazi yakho kangiyifumananga iyintombi egcweleyo? Kodwa nampu ubufakazi bokuthi indodakazi yami iyintombi egcweleyo.” Ngakho abazali bentombi bazakwendlala ilembu phambi kwabadala bakulelodolobho, 18 kuthi abadala bayijezise leyondoda.

19 Bazayihlawulisa amashekeli esiliva alikhulu, bawanike uyise wentombi, ngoba indoda le isigcone intombi yako-Israyeli. Intombi izaqhubeka ingumfazi wayo indoda; okwempilo yayo yonke akumelanga iyale lintombi.

20 Nxa kungenzeka ukuthi umlandu ewetheswayo uliqiniso njalo kungaze kwafunyanwa ubufakazi bobuntombi bayo,

21 izalethwa emnyango wendlu kayise kuthi amadoda akulelodolobho ayitshayele khona ngamatshe ize ife. Yenze into eyangisayo ko-Israyeli ngokungaziphathi ngesikhathi isahlala emzini kayise. Kumele liqede ububi phakathi kwenu.

22 Nxa indoda ingafunyanwa ilele lomfazi wenye indoda bobabili kumele babulawe. Kufanele liqede ububi ko-Israyeli.

23 Nxa kungenzeka ukuthi indoda ihlangane lentombi esikhombile edolobheni ilale layo,

24 lizabathatha bobabili libase esangweni lakulelodolobho libatshaye ngamatshe khona baze bafe – ngoba inkazana kayihlabanga umkhosi ukuthi ilanyulelwe yona isedolobheni, njalo indoda isixhwalise umfazi wenye indoda. Kumele liqede ububi phakathi kwenu.

25 Kodwa nxa kungenzeka ukuthi indoda ihlangane lentombi esikhombile egangeni ibe isiyibamba, indoda ekwenzileyo lokhu yiyo kuphela ezakufa. 26 Lingenzi lutho entombini; kayenzanga sono esingabangela ukuthi ife. Lindaba iyafanana leyomuntu ohlasela abulale umakhelwana wakhe, 27 ngoba indoda ifumene inkazana egangeni, noma intombi le ekhombileyo ibihlabe umkhosi, bekungelamuntu wokuyilamulela.

28 Nxa kungenzeka ukuthi indoda ihlangane lentombi engakakhombi ibe isiyibamba njalo kwazakale, 29 indoda leyo izahlawula uyise wentombi amashekeli esiliva angamatshumi amahlanu. Kumele iyithathe ibe ngumfazi wayo ngoba isiyigconile. Akumelanga iyale ukuphila kwayo konke.

30 Akumelanga ukuthi umuntu athathe umkayise; angahlazisi umbheda kayise.